د. بەرهەم ساڵح، سەرۆک کۆماری عێراق ئەمڕۆ یەکشەممە پێشوازیکرد لە حەیدەر عەبادی، سەرۆک وەزیرانی پێشووتری عێراق و لەبارەی بارودۆخی گشتیی وڵات و دۆسیەی هەڵبژاردنەکان گفتوگۆیان کرد.
بەپێی ڕاگەیەندراوی نووسینگەی ڕاگەیاندنی سەرۆكایەتیی كۆمار، لە دیدارەکەدا جەختکرایەوە لە پێویستیی پاراستنی ئاسایش و سەقامگیری و بەھێزکردنی ئاشتیی کۆمەڵایەتی و یەکڕیزیی نیشتمانی و پێکەوەژیانی نێوان سەرجەم پێکھاتەکان و سازان و دیالۆگ بۆ چارەسەرکردنی کێشە هەڵپەسێردراوەکان.
سەبارەت بە هەڵبژاردنەکان و ئەنجامەکانی، جەخت لە گرنگی پاراستنی پرۆسەی دیموکراسی و پێویستیی یەکلایکردنەوەی تانە و سکاڵاکان کرایەوە بەپێی یاسا و لەڕێگەی دەسەڵاتی دادوەریی تایبەتمەند و بەشێوەیەکی پیشەیی و بێلایەنانە، تاوەکو دەرئەنجامەکانی لەسەر بنەمای یاسایی و دەستوور بن ڕووەو پێکھینانی حکومەتێکی کارای کاریگەر کە لە ئاست قۆناغەکە و جێبەجێکردنی داوا ڕەواکانی خەڵک بێت بۆ ژیانێکی باشتر، وەك ڕاگەیەندراوەكە دەڵێت.
