ئەو كۆبوونەوانەی بۆ هەڵمەتی بانگەشەی دۆناڵد ترەمپ كاندیدی كۆماریخوازەكان بۆ سەرۆكایەتیی ئەمریكا ڕێكخراون، ژمارەیەكی زۆر لە بەشداربووانیان تووشی كۆرۆنا بوون و لە هەندێك ناوچە دا، ڕێژەی تووشبوون بە كۆرۆنا چوار هێندە بەرزبووەتەوە.
تۆڕی هەواڵی سی ئێن ئێن بەدواداچوونێكی كردووە بۆ ئاشكراكردنی ڕادەی كاریگەریی كۆبوونەوە و هەڵمەتەكانی بانگەشەی دۆناڵد ترەمپ، لە زیاتر تەشەنەسەندنی كۆرۆنا دا.
بە گوێرەی ئەنجامەكان، دەركەتووە ئەو كانتۆن و ویلایەتانەی میوانداریی ترەمپ-یان كردووە، تووشبوون بە كۆرۆنا تیایاندا بەڕێژەیەكی زۆر و بەخێرایی تەشەنەی سەندووە.
بەدواداچوونەكەی ئەو دامەزراوە ئەمریكییە، دەریخستووە كە 14 لەو كانتۆنانەی میوانداریی دۆناڵد ترەمپ-یان كردووە بۆ پشتیوانییكردن لێی و ناوبراو لەناو جەماوەردا وتاری خوێندووەتەوە، تووشبوون بە كۆرۆنا تا ڕێژەی 225% – 385% بەرزبووەتەوە.
بەدواداچوونەكە، ئاماری كۆرۆنا-ی بە درێژایی مانگێك بەر لە كۆبوونەوەكان و مانگێك دواتری وەرگرتووە، ئاشكرابووە كە لە 14 ناوچە و كانتۆن كە ترەمپ سەردانی كردوون لە ویلایەتەكانی مینیسوتا، وێسكنسۆن، ئەریزۆنا، پێنسڵڤانیا، نیو هامشەر، نۆس كارۆڵاین، میشیگان، نیڤادا، ئۆهایۆ و فڵۆریدا، ڕێژەی تووشبوون بە كۆرۆنا زۆر بە خێرایی بەرزبووەتەوە، بەراورد بە مانگێك بەر لە سازدانی كۆبوونەوەكان.
وەك ئەندامەكانی بەدواداچوونەكە ئاشكرایانكردووە، لە هەندێك لەو ناوچانەدا كە ترەمپ سەردانی كردوون و قەرەباڵغی دروستبووە، تووشبوونی دانیشتووان بە كۆرۆنا بە ڕێژەی 225% بەرزبووەتەوە و هەندێك ناوچەی تریش، ڕێژەكە 385% زیادیكردووە.
