شەوی ڕابردوو چەکدارانی داعش هێرشیانکردە سەر بارەگای فەوجی فریاکەوتنی دیالە و لە شەڕ و پێکدادانێکدا پۆلیسێک کوژرا و چەند کەسێکی دیکەش برینداربوون.
لە ڕاگەیەنراوێکدا شەوی ڕابردوو 29ی تشرینی یەکەم ڕاگەیاندنی حەشدی شەعبی ئاشکرایکردووە، “داعش ویستوویەتی هێرش بۆسەر خەڵکی مەدەنی دەستپێبکات بەتایبەت لە گوندی الغایە، بەڵام پێشوەخت هێرشەکە تێکشکێنراوە و دوای کاتژمێر و نیوێک داعش ناوچەکەی چۆڵکردووە.
هاوکات سەرچاوە ئەمنییەکانی ناوچەکە ئاشکرایان کردووە کە شەڕەکەی داعش لەگەڵ پۆلیسی فریاکەوتنی دیالە لە نزیک پردی حەلوان بووە لە باکوری ناحیەی جەلەولا و شەڕەکە چەند کاتژمێرێکی خایاندووە.
ماوەی چەند مانگێکە داعش لە سنورەکانی خانەقین و جەلەولا و قەرەتەپە ناوبەناو هێرش ئەنجام دەدات و لە نزیکترین ڕوداویشدا چەکدارانی داعش لە نزیک جەلەولا بازگەیان بۆ خەڵکی مەدەنی داناو و سێ کەسیان کوشت کە بەڕەگەز عەرەب بوون و چەند کەسێکی دیکەشیان ڕفاند.
