بەڕێوەبەری نەخۆشخانەی منداڵانی فێرکاری لە سلێمانی ڕایگەیاند، ڕێژەی تووشبوون بە پەتا و کۆرۆنا لەناو منداڵاندا کەمیکردووە، ئەوەش بە پێوەری ئەو ڕێژەیەی سەردانی نەخۆشخانە دەکەن.
دكتۆر پشدەر عەبدوڵڵا، بەڕێوەبەری نەخۆشخانەی (دکتۆر جەمال ئەحمەد ڕەشیدی منداڵانی فێرکاری) بە تۆڕی میدیایی ئێستا ڕایگەیاند، “دوانزە ڕۆژ پێش ئێستا پێشنیازێکم کرد ئەگەر بۆ 10 ڕۆژی تر ئەم پەتای وەرزی و کۆرۆنایە کەمنەکات، ئەوا باشترە بۆ ماوەی 10 ڕۆژ دەوامی خوێندنگاکان ڕابگیرێت، سوپاس بۆ خودا بۆ ماوەی هەفتەیەک دەبێت، ژمارەی ئەوانەی سەردانی بەشی ڕاوێژکاریی نەخۆشخانە دەکەن بەڕێژەی %30 بۆ %40 کەمیكردووە، ئەوانەشی پێویستیان بە داخڵکردن هەیە لە نەخۆشخانە بەهەمانشێوە ژمارەیان کەمیکردووە”.
بە بۆچوونی دكتۆر پشدەر عەبدوڵڵا، دابەزینی ئەو ڕێژەیە بە گومانەوە پەیوەندی بە دروستبوونی بەرگریی ڕێژەیەکی زۆر لە منداڵاندا بێت بۆ ئەو پەتایانە لەگەڵ گۆڕانی کەش و هەوا بۆ هەوایەکی تاڕادەیەک شێدار”.
بەڕێوەبەری نەخۆشخانەی (دکتۆر جەمال ئەحمەد ڕەشیدی منداڵانی فێرکاری) ئاماژەی بەوەشکرد، “گرنگ نییە گوێمان بۆ دەگیرێت یان نا، ئەوەی لامان گرنگە ئەوەیە هەموو لایەک ئاگاداری گۆڕانکارییەکانی تەندروستی بن، بۆ ئەوەی ڕێکاری پێویست بگیرێتەبەر بۆ چارەسەرکردنی کێشە و گرفتەکان و ڕێگریکردن لە دروستبوونی کارەسات”.
