ئەو كرێكارانەی لە هەولێر کەلوپەلی خۆراکی لە بارهەڵگرەكانەوە دادەگرن و دەیگوازنەوە كۆگاكان، دژی پێنەدانی مافە داراییەكانیان، گردبوونەوەیان ئەنجامدا.
كرێكارە ناڕازییەكان سەر بە بەڕێوبەرایەتیی بازرگانیی کەلوپەلی خۆراکیی هەولێرن و لەبەردەم بەڕێوەبەرایەتییەكە گردبوونەوە، ڕایانگەیاند، چەند ڕۆژێكە پارەی كار و ماندووبوونیان پێنەدراوە، لەكاتێكدا بەرامبەرە ماددییەكەی كارەكەیان هاوتا نییە لەگەڵ ماندووبوونەكەیان.
كرێكارە ناڕازییەكان قسەیان بۆ تۆڕی میدیایی ئێستا كرد، دەڵێن، پێشتر یەك تۆن كەلوپەلیان بە چوار هەزار دینار دادەگرت و دەگواستەوە، بەڵام لەگەڵ ئەوەی ئێستا تۆنێك بە دوو هەزار و پێنجسەد دینار دادەگرن، چەند ڕۆژێكە پارەیان نەدراوەتێ.
كرێكارەكان ژمارەیان نزیكەی 100 كەسە و دووپاتیانكردەوە، بژێویی خانەوادەكانیان لەسەر كاركردنی ئەمانە.
