ڕێکخراوی یونسێفی سەر بە نەتەوە یەکگرتووەکان ڕایگەیاند، نزیکەی 1.6 ملیۆن منداڵ لەجیهاندا لەسەرەتای بڵاوبوونەوەی ڤایرۆسی کۆرۆناوە لە پرۆسەی خوێندن دابڕاون و تا ئێستا نەگەڕاونەتەوە بۆ خوێندن.
ڕێکخراوی یونسێف لەدوایین بڵاوکراوەیدا دەڵێت، ڤایرۆسی کۆرۆنا هۆکاری پەککەوتنی پرۆسەی خوێندن و دابڕانی منداڵانە لە سەرتاسەری جیهاندا، ئەمەش هەڕەشە لەبەرەوپێشچوونی پرۆسەکە دەکات بۆ چەند دەیەیەک.
رێكخراوەكەی سەر بە نەتەوە یەكگرتووەكان جەختیکردووەتەوە لە دووبارە دەستپێکردنەوەی خوێندن لەو شوێنانەی بەهۆی کۆرۆناوە قوتابخانەکان داخراون، ئەمەش لەپێناو پاراستنی داهاتووی منداڵان، داواشی لە وڵاتانی جیهان کرد دەرگای خوێندنگەکان بکەنەوە.
ئەو هۆشدارییەی یونسێف بەبۆنەی نزیکبوونەوەی ڕۆژی جیهانیی منداڵانەوەیە و بەناوی “خوێندن بۆ هەموو منداڵێک” بڵاویکردووەتەوە.
