حکومەتی بەریتانیا ڕایگەیاند، زۆریی ژمارەی ئەو کۆچبەرانەی لەڕێگەی سنوورە ئاوییەکانی نێوان بەریتانیا و فەرەنساوە بەنایاسایی دەپەڕنەوە قبوڵکراونییە، ئەمەش دوای ئەوەی لە 24 کاتژمێری ڕابردوودا زۆرترین هەوڵی پەڕینەوە بۆ بەریتانیا دراوە.
وتەبێژی وەزارەتی ناوخۆی بەریتانیا ڕایگەیاند، “بەریتانییەکان بەبەردەوامی گیانلەدەستدانی کۆچبەران دەبینن لەکاتی هەوڵەکانی پەڕینەوەیان بۆ بەریتانیا بەهۆی ئەوەی لەلایەن چەتەکانی قاچاخچێتییەوە هیچ بەزەییەکیان پیشاننادرێت”، جەختیشیکردەوە یاسا نوێیەکانی کۆچ ڕێگری لەو هەوڵانە دەکەن.
دوێنێ پێنجشەممە پەڕینەوەی کۆچبەران لە سنوورە ئاوییەکانی نێوان بەریتانیا و فەرەنساوە ژمارەی پێوانەیی تۆمارکرد کە لە ماوەی 24 کاتژمێردا هەزار کۆچبەر پەڕیونەتەوە بۆ بەریتانیا.
دوێنی پەڕینەوەی کۆچبەران لە کەناڵی ئاویی مانشەوە ژمارەی پێوانەیی پێشووی تێپەڕاند کە لە مانگی تشرینی یەکەمی ڕابردوودا تۆمارکرابوو و ژمارەکە 853 کۆچبەر بوو لە ڕۆژێکدا.
لەهەمانکاتدا دەسەڵاتی دەریایی فەرەنسا ڕایگەیاند، ئەمڕۆ هەینی لەکاتی ڕزگارکردنی ژمارەیەک کۆچبەردا کە هەوڵی پەڕینەوەیان داوە سێ کۆچبەر خنکاون.
