وەزارەتی رۆشنبیری گشتاندنێکی ئاراستەی میدیاكان کردووە و ئاگاداریان دەكاتەوە، كە خۆیان لە گفتوگۆكردن و وەرگرتنی وتە لە بەندكراوان بەدووربگرن.
گشتاندنەکە لەلایەن بەشی یاسایی بەڕێوەبەرایەتیی گشتیی راگەیاندن، چاپ و بڵاوكردنەوەی سەر بەو وەزارەتە بڵاوكراوەتەوە و واژووی شیروان عەوڵا خورشید، بەڕێوەبەری گشتیی لەسەرە و ئاراستەی بەڕێوەبەرایەتییەكانی سلێمانی، هەولێر، دهۆک و سۆران كراوە.
تێیدا ئاماژە بەوەکراوە، پێویستە گشت میدیاكانی بینراو، بیستراو، خوێندراو، ئەلیكترۆنی و پۆرتاڵ، خۆیان بەدووربگرن لە گفتوگۆكردن و وەرگرتنی وتەی كەسانی بەندكراو، بەپێی ماددەی 3 و ماددەی 6 لە رێنمایی ژمارە 3ـی ساڵی 2017ـی وەزارەتی كاروباری كۆمەڵایەتی.
ئەوەش خراوەتەڕوو، رێگری دەكرێت لە سزادراوان كە چاوپێكەوتنی تەلەڤیزیۆنی و تۆماری دەنگی و ڤیدیۆیی بۆ دەزگاكانی راگەیاندن بنێرن و بڵاوبكرێتەوە.
لە گشتاندنەكەدا هاتووە، “هەر دەزگایەكی میدیایی پابەندی ئەو یاسایە نەبێت و لۆجیک و ئیتیكی كاری رۆژنامەوانی ببەزینێت، رووبەڕووی یاسا دەكرێتەوە و رێكاری یاسایی بەرامبەر دەگیرێتەبەر”.
