فەرمانگەی پەیوەندییەکانی دەرەوەی حکومەتی هەرێمی کوردستان ڕایگەیاندووە، منداڵێکی تازە لەدایکبوو، لە سنوورەکانی بیلاڕوسیا – پۆڵەندا دەگەڕێندرێتەوە هەرێمی کوردستان و چارەسەری پێویستی بۆدەکرێت.
بەپێی زانیارییەکانی فەرمانگەی پەیوەندییەکانی دەرەوە، ئەو منداڵە لەسەر سنوورەکان لە بارودۆخێکی سەختدا لەدایکبووە و دوای دروستکردنی هاوئاهەنگی، بڕیارە منداڵەکە و کەسوکارەکەی بگەڕێندرێنەوە هەرێمی کوردستان.
خێزانە کوردەکە ڕەزامەندییان دەربڕیوە لەسەر گەڕانەوەیان بۆ هەرێمی کوردستان و بڕیارە دوای تەواوکردنی ڕێکارەکان بگەڕێندرێنەوە.
دوای کردنەوەی ڕێگای بیلاڕوسیا – پۆڵەندا هەزاران کۆچبەری کورد ئەو ڕێگایەیان گرتەبەر بۆ گەیشتن بە ئەوروپا، بەپێی زانیارییەکانی ڕۆژنامەی بێڵدی ئەڵمانی 73 هەزار هاوڵاتیی هەرێم چوونەتە بیلاڕوسیا.
