کۆچبەرانی کورد لە سنوورەکانی وڵاتی پۆڵەندا داوا لە یەکێتیی ئەوروپا و نەتەوە یەکگرتووەکان دەکەن بەهانایانەوە بچن و دەڵێن، “لەدۆخێکی زۆر خراپدان”.
لە نامەیەکدا کە بەناوی کۆچبەرانی سنووری پۆڵەنداوە ئاراستەی یەکێتیی ئەوروپا، کۆمەڵگەی نێودەوڵەتی، نەتەوە یەکگرتووەکان و ڕێکخراوەکانی مافی مرۆڤ و ڕێکخراوە ئاینییەکانیان کردووە ڕایانگەیاندووە، “منداڵی شەش مانگمان لەگەڵدایە ، منداڵ لە هەموو تەمەنێکی تێدایە، ژن و پیاوی پیرو پەکەوتەمان لەگەڵدایە هەمووی سەرما و برسی و تینویەتی تکایە لەوە زیاتر ناتوانن بەرگەی ئەو هەموو ئازارو ناخۆشیە بگرین، تکایە فریامان بکەون ڕزگارمان بکەن”.
ئەو کۆچبەرانە ڕەتیدەکەنەوە بگەڕێنەوە بۆ وڵاتی خۆیان و دەڵێن، ” ئێمەی کۆچبەران لە سنووری پۆڵەندا دەمانەوێت کۆچ بکەین بەرەوە وڵاتانی تری ئەوروپا و بەهیچ جۆرێک نا مانەوێت بگەڕێینەوە وڵاتی خۆمان”.
ئاماژەیان بەوەکردووە، کە لەسنووری پۆڵەندا نزیکەی شەش هەزار سەرباز و پۆلیسی ئەو وڵاتە ڕێگرییان لێدەکەن سنوور تێپەڕێنن و بڕۆنە ناو خاکی ئەڵمانیا و ڕایانگەیاندووە، ” لە دۆخێکی زۆر خراپداین”.
باسیان لەوەکردووە کە پۆلیس و سەربازانی پۆڵەندی لە زەوی و ئاسمانەوە گازی ژەهراویان بەسەردا دەبارێنن، بیبەری توون و تیژمان تێدەگرن، بەهۆیەوە ڕووخساریان سوتاوە “تکایە فریامان بکەون”.
