مەهدی سەفەری جێگیری دیپلۆماسیی ئابوریی وەزیری دەرەوەی ئێران، لە کۆبوونەوەیەکدا لەگەڵ پارێزگاران و بەرپرسانی ژووری بازرگانیی سلێمانی و هەڵەبجە، كە لە شاری سلێمانی بەرێوەچوو ڕایگەیاند، وڵاتەکەی ئامادەی هەموو هەماهەنگییەک و پەیوەندییەکی بازرگانییە.
كۆبوونەوەكە دوێنێ بووە و لە کونسوڵگەریی ئێران لە سلێمانی بەرێوەچووە.
بەپێی زانیارییەکان، لەو کۆبوونەوەیەدا باس لە کۆمەڵێک کێشەی بازرگانیی نێوان پارێزگاكانی سلێمانی و هەڵەبجە، لەگەڵ کۆماری ئیسلامی ئێران کراوە و بەڵێنی چارەسەر دراوە.
مەهدی سەفەری، لە کۆبوونەوەکەدا ڕایگەیاندووە، “بەو پەیوەندییە مێژوویی و دینی و فەرهەنگییەی لەنێوان ئێران و هەرێمدا هەیە، دوورنییە کە پەیوەندیی بازرگانی و ئاستەکانی دیکە زیاتر بەرەوپێشبچێت”.
هاوکات بەرپرسانی پارێزگاكانی سلێمانی و هەڵەبجە، چەند کێشەیەکی بازرگانیی نێوان هەردوولایان بە جێگری دیپلۆماسیی ئابوریی وەزیری دەرەوەی ئێران وتووە.
ئەو بەرپرسە ئێرانییە داوایکردووە، لەگەڵ ئامادەیی کۆمپانیاکانی وڵاتەکەی، هەماهەنگیی زیاتر دروستبکرێت بۆ کاری کۆمپانیا ئێرانییەکان.
