کۆنگرێس پلانە یەک تریلیۆن دۆلارییەکەی بایدنی بۆ پەرەپێدانی ژێرخانی ئابوری پەسەندکرد

زۆرینەی ئەندامانی کۆنگرێس دەنگیان لە بەرژەوەندیی پڕۆژەیاسای پەرەپێدانی ژێرخانی ئابوریی ئەمریکا دا کە بڕەکەی لە یەک تریلیۆن دۆلار زیاترە.

ئەمڕۆ شەممە 228 ئەندامی کۆنگرێس دەنگیان بە پەسەندکردنی پڕۆژەیاساکە دا، لەبەرامبەردا 206 ئەندام پڕۆژەیاساکەیان ڕەتکردەوە و بڕیارە ڕەوانەی لای جۆ بایدن بکرێت بەمەبەستی واژووکردنی و بوونی بە یاسا.

پلانی وەبەرهێنانەکە کە بەبڕی 1.2 تریلیۆن دۆلار پاڵپشتیی ژێرخانی ئابوریی ئەمریکا دەکات لەلایەن جۆ بایدنەوە پێشنیازکراوە، پەسەندکردنی ئەو پلانە بە سەرکەوتنێک بۆ بایدن لەماوەی سەرۆکایەتییەکەیدا دادەنرێت.

پڕۆژەیاساکە ڕەزامەندیی زۆرینەی کۆنگرێسی بەدەستهێنا دوای ئەوەی ئەندامانی دیموکراتەکان و 10 کۆنگرێسمانی کۆمارییەکان دەنگیان بە بەڵێ لەسەر دا، پێشتریش لە مانگی ئابدا ئەنجومەنی پیران پلانەکەی پەسەندکرد.

ئەوەی ئێستا پڕۆژەیاساکە پێویستیەتی بۆئەوەی بچێتە بواری جێبەجێکردنەوە واژووکردنیەتی لەلایەن جۆ بایدنی سەرۆکی وڵاتەکەوە.

لەگەڵ ئەوەشدا پەسەندکردنی ئەو پلانە بە نیوە سەرکەوتن بۆ بایدن دادەنرێت، چونکە تائێستا کۆنگرێس بڕیاری نەداوە لەسەر پەسەندکردنی پلانەکانی دیکەی بایدن بۆ وەبەرهێنان لەبوارەکانی کۆمەڵایەتی و ئاووهەوادا.

دوێنێ هەینی جۆ بایدن سەبارەت بەو دوو پلانە وتی، “داوا لە سەرجەم ئەندامانی کۆنگرێس دەکەم بە بەڵێ دەنگ لەسەر ئەو دوو پلانەی دیکەش بدەن”.

بابەتی پێشتر

كۆنگرەی ڕۆژنامەوانیی پۆچتینۆی ڕاهێنەری پاریس

بابەتی دواتر

فەرمی.. چاڤی بوو بە ڕاهێنەری بەرشلۆنە

بابەتی پەیوەندیدار