دامەزراوەیەکی سەربە “شورای ئەوروپا” چەند پۆستەرێکی لەبارەی ماف و جیاوازییەکانەوە بڵاوکردووەتەوە و چەند پۆستەرێکی لەبارەی حیجابەوە کاردانەوەی فەڕەنسییەکانی لێکەوتەوە.
لە یەکێک لە پۆستەرەکاندا، کە وێنەیەکە لایەکی ژنێکی بێ حیجابە و لایەکەی دیکەی ژنێکی حیجاب بۆشە کاردانەوەی فەڕەنسییەکانی لێکەوتەوە، وەک وەزیری لاوانی فەڕەنسا وتوویەتی، پۆستەرەکە بۆ ئەو شۆک بووە.
سارا حایری، وەزیری لاوانی فەڕەنسا لەبارەی پۆستەرەکەوە ڕایگەیاندووە، ” توشی شۆک بووم کە پۆستەرێکم بینووە لایەکی ژنێکە قژی دیارە و لایەکەی دیکەی ژنێکی حیجابە، بەراوردکردن و هاوتاکردنی ئەو پرسە دژی بنەماکانی فەڕەنسای سیکۆلارە”.
پۆستەرەکە لەسەری نوسراوە، “جوانی لە جیاوازیدایە و حیجابیش ئازادییە”.
دامەزراوەکەی سەربە “شورای ئەوروپا” ئاشکرایکردووە، کە پۆستەرەکەی سڕیوەتەوە و هەوڵیش دەدەن وردتربن لە گەیاندی پەیامی “ماف و جیاوازییەکاندا”.
“شورای ئەوروپا” یەکێکە لە کۆنترین دامەزراوە سیاسییەکانی ئەوروپا و ئامانجی جێگرکردنی مافی مرۆڤ و دیموکراسی و حکومەتی یاساییە، چالاکییەکانی لەچێوەی سیاسەتەکانی یەکێتی ئەوروپادایە.
