کۆچبەرێکی کوردی خەڵکی هەرێمی کوردستان، لە ڕێگای گەیشتن بە بەریتانیا توانای مانەوەی نەبووە لە سەرمادا و گیانیلەدەستداوە.
هاوڕێکانی ئەو گەنجە کوردە ئاشکرایدەکەن، “ئەوان زیاتر لە 10 کەس بوون و ویستویانە بە یەختێک خۆیان بگەیەننە بەریتانیا، بەڵام لە ڕێگادا یەختەکەیان لەکاردەکەوێت و ئەو گەنجە نەیتوانیووە خۆی لەبەر سەرمای ناو ئاوەکەدا ڕاگرێت و گیانیلەدەستداوە”.
وەک هاوڕێیانی ئاشکرایدەکەن، “گەنجەکە ناوی “عەلی” بووە و خەڵکی ناوچەی شارەزوور بووە و پێشتر نەخۆشی گورچیلەکانی هەبووە”.
ئەو کۆمەڵە کۆچبەرە دوای ئەوەی بۆماوەی دوو کاتژمێر لە ئاوی نێوان فەڕەنسا بەریتانیا چاوەڕێدەکەن، هێزی فریاکەوتنی بەریتانیا بەهانایانەوە دەچێت و ڕزگاریان دەکات.
ئەوە سێهەمین گەنجی کوردە، کە لەماوەی 10 ڕۆژی ڕابردوودا لەڕێگای ئەوروپا گیانلە دەستدەدات.
