بە بڕیاری وەزیری دارایی، هەریەكە لە بەڕێوەبەری مەرزی پەروێزخان و بەڕێوەبەری گومرگی گەرمیان دوورخراونەتەوە، بڕیارەكە بە فەرمی نەگەیشتووەتە دەستیان، بەڵام بە تەلەفۆن ئاگاداركراونەتەوە.
بەپێی زانیارییەكانی تۆڕی میدیایی ئێستا، ئەمڕۆ وەزیری دارایی حكومەتی هەرێمی كوردستان بڕیاریداوە بە لەسەركارلادانی هەردوو بەڕێوەبەری مەرزی پەروێزخان و گومرگی گەرمیان.
پەیامنێری تۆڕی میدیایی ئێستا گواستیەوە، فەرمانی لەسەركارلادانەكە نەگەیشتووەتە دەستی دوو بەڕێوەبەرەكە، بەڵام بە تەلەفۆن پێیانوتراوە نەچنەوە سەر كار، بە ئەگەرێكی زۆر ئەمڕۆ فەرمانەكە دەگاتە دەستیان.
لەسەركارلادانی بەڕێوەبەری مەرزی پەروێزخان و بەڕێوەبەری گومرگی گەرمیان لەكاتێكدایە، لەماوەی ڕابردوودا شۆفێرانی مەرزەكە مانیانگرت و بۆ ماوەیەك هاتوچۆ لە مەرزەكەوە ڕاگیرا، دوێنێ دەستیپێكردەوە.
