بەڕێوەبەرایەتیی نەوت و کانزاکانی سلێمانی ڕایگەیاند، ئەمڕۆ لە مەڵبەندی پێنجەوە دابەشکردنی نەوتی سپی دەستپێدەکات، ئەو شوێنانە وەریدەگرن کە ساڵی ڕابردوو نەوتیان پێنەدراوە.
پێشتر محەمەد حەسیب، بەڕێوەبەری نەوت و کانزاکانی سلێمانی بە تۆڕی میدیایی ئێستای ڕاگەیاندبوو، “ڕۆژی دووشەممە یەکی تشرینی دووەم نەوتی سپی دەگاتە سەنتەری شاری سلێمانی و دەست بە دابەشکردنی دەکرێت”.
دابەشكردنی نەوتی ناوشاری سلێمانی لە مەڵبەندی پێنجەوە دەستپێدەكات و تا مەڵبەندی دە بەردەوام دەبێت، بەو پێیەی ئەو مەڵبەندانە ساڵی ڕابردوو بەشەنەوتیان بەسەردا دابەشنەكرا.
حکومەتی عێراق ڕۆژانە زیاتر لە 20 هەزار لیتر نەوت ڕەوانەی سلێمانی دەکات و بەپێی خشتەیەک کە بەڕێوەبەرایەتی نەوت و کانزاکانی سلێمانی دایناوە، نەوت بەسەر مەڵبەندەکاندا دابەشدەکرێت.
بەپێی ئەو ڕێکارەی ئەمساڵ حکومەتی هەرێم دایناوە، هەرخێزانێک بڕی 200 لیتر نەوتی سپی بەنرخی 55 دینار پێدەدرێت.
