ئاژانسە هەواڵییەکانی ئەڵمانیا ئاشکرایانکرد، لەکاتی پشکنینی بارهەڵگرێکدا لە سنوری پۆڵەندا ــ ئەڵمانیا 23 کۆچبەری عێراقی دەستگیرکراون.
بەپێی زانیارییەکان، لەکاتی دەستگیرکردنی کۆچبەرەکاندا شۆفێر و سەرنشینی پێشەوەی بارهەڵگرەکە ڕایانکردووە، بەڵام دواتر دەستگیرکراون.
لەناو کۆچبەرە عێراقییەکاندا، ژن و منداڵ هەن و ویستویانە لە پۆڵەنداوە خۆیان بگەیەننە ئەڵمانیا و خۆیانداوەتە دەستی قاچاخچییەکی سوری.
ماوەی چەند مانگێکە ڕێڕەوی کۆچبەرانی عێراقی و سوری و ئەفغانی، لە یۆنان و ئیتاڵیاوە گۆڕاوە بۆ وڵاتی بیلاڕوسیا و لەوێوە بۆ پۆڵەندا و ئینجا بۆ ئەڵمانیا، ئێستا بەهۆی هاتنی وەرزی زستانەوە دۆخی بەشێک لەو کۆچبەرانە لە سنوری وڵاتانی بیلاڕوسیا و پۆڵەندا و ئەڵمانیا لەژێر مەترسیدایە.
بەپێی ئەو ئامارانەی بڵاوکراوەتەوە، لەم ڕێگا نوێیەی کۆچبەراندا تا ئێستا هەشت کەس گیانیان لەدەستداوە.
