پۆلیسی هەولێر بڵاویكردووەتەوە، لەكاتی لافاوەكەی دوێنێی ناوچە جیاوازەكانی پارێزگاكە، 25 كەسیان ڕزگاركردووە.
پۆلیسی هەولێر دەستخۆشیی عەمید – دلێر نەجاڕ بەڕێوەبەری پۆلیسی پارێزگای هەولێری گەیاندووەتە سەرجەم هێزەكانی بەڕێوەبەرایەتیی پۆلیس، پۆلیسی بەرگریی شارستانی، تیمی فڕۆكەوانیی هەولێر، تیمەکانی شارەوانی و تەواوی ئەو تیمانەی دیكە، كە توانیویانە 25 كەس ڕزگاربكەن لە كاتی دروستبوونی لافاوەكەی دوێنێ.
دوێنێ بەهۆی تاوەبارانێكی بەخوڕەوە لە ناوشاری هەولێر و ناوچەكانی دەوروبەری، لافاو دروستبوو، زیانی بە ماڵ و ئۆتۆمبێلێكی زۆر گەیاند.
ساڵانە لە هەولێر بەهۆی بارانەوە لافاو دروستدەبێت، بەگشتی ئاو لەژێر بەرزەپردەكان و شەقامەكاندا كۆدەبێتەوە، بەڵام لافاوەكەی دوێنێ زیاتر و زیانمەندتر بوو.
