قەتەر داوای لێبوردن دەكات بەهۆی ئەوەی لە سەرەتای ئەم مانگەدا لە فڕۆكەخانەی دەوحە گەشتیارانی ناچار كردووە پشكنینی ژنانەیان بۆ بكرێت، ڕوداوەكەش كاردانەوەی بەدوادا هاتووە.
بەیانی ئەمڕۆ چوارشەممە 28ی تشرینی یەكەم حكومەتی قەتەر لە ڕاگەیەندراوێكدا ئاماژەی بەوەكردووە، “وڵاتی قەتەر جەخت دەكاتەوە كە پێویست بووە ئەو ڕێوشوێنە خێرایە بگرێتە بەر لەگەڵ گەشتیاراندا، بۆ ئەوەی ئەو تاوانە قێزەونە ئاشكرا بكات”.
حكومەتی قەتەر ڕاشیگەیاندووە، “داوای لێبوردن دەكەین كە هەر گەشتیارێكمان هەراسان كردبێت یان جۆرێك مامەڵەی بێمەبەستیان لەگەڵدا كرابێت كە وەك دەستدرێژی بۆسەر ئازادی كەسی لێكدراوەتەوە”.
لە ڕاگەیەندراوەكەدا ئەوەش خراوەتەڕوو، ئاسایش و پارێزراوی و ئاسودەیی گەشتیاران ئامانجیانە.
سەبارەت بە تەندروستیی منداڵەكەش حكومەتی قەتەر دەڵێت، منداڵەكە لەنێو كیسەیەكی پلاستیكدا دۆزراوەتەوە كە خراوەتە سەلەیەكی خۆڵەوە لە فڕۆكەخانەكە، ئێستا تەندروستیی زۆرباشە و لە دەوحە لەژێر چاودێریی تەندروستییدایە.
یەكێك لەو وڵاتانەی ڕەخنەی لەو هەنگاوەی قەتەر گرتووە وڵاتی ئوسترالیایە كە لە زاری ماریز باین، وەزیری دەرەوەی وڵاتەكەوە ڕایگەیاندووە، پشكنینی “ناو ڕەحم” بۆ 18 هاوڵاتیی وڵاتەكەی كراوە.
وەزیرە ئوسترالییەكە ئەوەشی خستوەتەڕوو، “بە هەموو تەمەنم شتی لەو جۆرەم نەبیستووە، ئەو كەیسەمان ڕادەستی پۆلیسی فیدڕاڵی ئوسترالیا كردووە”.
ئوسترالیا ئاماژەی بەوەشكردووە، لەگەڵ ئەو وڵاتانە هەماهەنگی دەكات كە هاوڵاتییەكانیان لەو فڕۆكەخانەیە پكشنینەكەیان بۆ كراوە بۆ ئەوەی یەكدەنگ بن لەو كەیسەدا.
