سە‌رۆكایە‌تیی شارەوانیی سلێمانی ڕایگەیاند، هەر هاوڵاتییەک بەهەر شێوازێک ببێتەهۆی بڕینەوە یان هەڵکەندنی دارێک، بەپێی تەمەنی دارەکە سزای پێبژاردنی بەسەردا دەسەپێندرێت.
بەپێی ئەو بڕیارانەی لەلایەن شارەوانیی سلێمانیەوە ئاشکراکراوە، شێوازەكانی بڕینەوەی دار و سزاكان پۆلێنكراون.
یەکەم: هەر هاوڵاتییەک دارێک بە ئەنقەست ببڕێتەوە بە مەبەستی پڕۆژەی بازرگانی، بەپێی تەمەنی دارەکە سزادەرێت، بۆهەر ساڵێک بڕی 350 هەزار دیناری لێوەردەگیرێت.
دووەم: هەر هاوڵاتییەک بەمەبەستی سووتاندن یان بەکارهێنانی، دارێک ببڕێت و دارەکە لەشوێنێکی گشتیدا بێت وەک باخچە و پارکەکان، بە بڕی 150 هەزار دینار سزادەدرێت.
سێێەم: هەر درەختێک بۆ نۆژەنکردنەوە و فراوانکردنی هەر دامەرزاوەیەکی (بینای بازرگانی یان کارگە و خانوو) ببڕدرێتەوە، بەپێی تەمەنی دارەکە هەر ساڵێک بڕی 250 هەزار دیناری لێوەردەگیرێت.
چوارەم: لەکاتی خۆپیاکێشانی ئۆتۆمبیل یان هەر هۆکارێکی دیکەی نەخوازراو دارێک ببڕێتەوە، بکەری ڕووداوەکە سزادەدرێت بەپێی تەمەنی دارەکە و بۆهەر ساڵێک 100 هەزار دیناری لێوەردەگیرێت.
