شاندی کۆماری ئیسلامیی ئێران بەسەرۆکایەتیی عەلی باقری، جێگری وەزیری دەرەوەی ئەو وڵاتە، گەیشتە برۆکسل، وەک هەنگاوێک بۆ دەستپێکردنەوەی گفتوگۆکانی نێوان وڵاتانی ئەوروپا و ئێران سەبارەت بۆ دۆسیەی ئەتۆمی.
بڕیارە عەلی باقری نوێنەری شاندی ئێران و ئێنریکی مۆرا نوێنەری وڵاتانی ئەوروپا دیدارێک ئەنجامبدەن بۆ گفتوگۆکردن سەبارەت بە دەستپێکردنەوەی دانوستانەکانی ڤیەننا.
پیتەر ستانۆ نوێنەری باڵای سیاسەتی دەرەوە و ئاسایشی یەکێتیی ئەوروپا ڕۆژی دووشەممە بە ئاژانسی فرانس پرێسی ڕاگەیاندبوو، بڕیارنییە شاندەکە هیچ کۆبوونەوەیەک لەگەڵ جۆزێف بۆریێل ئەنجامبدات وەک ڕێکخەری دانوستانەکانی نێوان ئێران و گەورە وڵاتانی ئەوروپا سەبارەت بە دۆسیەی ئەتۆمی.
لە مانگی نیسانی ئەمساڵدا دانوستانەکانی ڤیەننا سەبارەت بە ڕێککەوتنی ئەتۆمیی 2015 لەنێوان وڵاتانی ئەوروپا و ئێران دەستیپێکرد، کە بەر لە سێ ساڵ دۆناڵد ترەمپ بڕیاری کشانەوەی ئەمریکای لە ڕێککەوتنەکە دا و سزاکانی بۆسەر ئێران گەڕاندەوە.
بە ماوەیەك پێش هەڵبژاردنەکانی سەرۆکایەتیی ئێران گفتوگۆکانی ڤیەننا ڕاگیران، لەگەڵ ئەوەشدا هەریەکە لە ئەمریکا ئێران و وڵاتانی ئەوروپا بە بەردەوامی باس لە گەڕانەوە بۆ گفتوگۆکانی ڤیەننا دەکەن، پێشتریش ئێران ڕایگەیاند، گفتوگۆکان لەماوەیەکی نزیکدا دەستپێدەکەنەوە، بێ ئەوەی کاتەکەی دیاریبکات.
