ڕۆژنامەیەكی توركی باس لە دەستپێكردنەوەی گفتوگۆی نێوان دەسەڵاتەكەی ئەردۆغان لەگەڵ كورد دەكات، میتی توركیا بۆ بەڕێوەبردنی گفتوگۆكان ڕاسپێردراوە.
ڕۆژنامەی زەمان-ی توركی بڵاویكردووەتەوە، “دەسەڵاتەكەی پارتی داد و گەشەپێدان، كە ساڵانێكە لەنێوان سیاسەتە ناوخۆیی و دەرەكییەكان گیریخواردووە و پێش هەڵبژاردنی سەرۆكایەتیی ساڵی 2023 ڕێژەی دەنگەكانی بۆ 30% كەمیكردووە، دووبارە چارەسەری لە هاوڵاتییانی كورد دۆزیوەتەوە”.
ڕۆژنامەكە زانیارییەكانی لە سەرچاوە ئەمنییەكانەوە وەرگرتووە، ئاشكرایانكردووە، ئەردۆغان دەزگای هەواڵگریی چالاككردووە بۆ قۆناغی دووەمی گفتوگۆ لەگەڵ كورد، دوای قۆناغی یەكەم، كە ساڵی 2009 دەستیپێكرد و ناونرا “پرۆسەی ئاشتی”، یان “كرانەوەی دیموكراسی”.
گفتوگۆكانی ئەمجارە لەلایەن هاكان فیدان سەرۆكی دەزگای هەواڵگریی توركیا – میت ئەنجامدەدرێت، بە ڕێنمایی ڕەجەب تەیب ئەردۆغان.
بەپێی سەرچاوەكانی ڕۆژنامەی زەمان، هەردوولا چەند كۆبوونەوەیەكیان لە برۆكسل-ی پایتەختی بەلجیكا ئەنجامداوە، بێ ئەوەی ڕۆژنامەكە ئاشكرایبكات ئەو لایەنە كوردییەی گفتوگۆی لەگەڵكراوە كێ و كوێیە.
چەند بەرپرسێك لە پارتی دیموكراتی گەلان – هەدەپە بانگهێشتی كۆبوونەوەكان كراون، بەڵام ڕەتیانكردووەتەوە بەشداریی گفتوگۆكان بكەن، چونكە دڵنیان لەوەی هەنگاوەكەی ئەردۆغان بەهۆی كەمبوونەوەی دەنگەكانی و پێویستبوونێتی بە دەنگی كورد بۆ دووبارە هەڵبژاردنەوەی بە سەرۆك.
هەر سەرچاوەكانی ڕۆژنامە توركییەكە دەڵێن، میت و پارتی داد و گەشەپێدان دەیانەوێت هەڵكشانی سیاسیی سەڵاحەدین دەمیرتاش هاوسەرۆكی پێشووتری هەدەپە بشكێنن، كە نزیكەی چوار ساڵە زیندانیكراوە.
قسەكردن لەسەر گفتوگۆی نێوان دەسەڵاتەكەی ئەردۆغان و كورد لەكاتێكدایە لەئێستادا دەسەڵاتی دادوەریی توركیا سەرقاڵی دۆسیەی داخستنی پارتی دیموكراتی گەلان – هەدەپەیە.
