هێزە ئەمنییەكانی سودان ژمارەیەك وەزیر و بەرپرسی باڵای وڵاتەكەیان دەستگیركرد و دەنگۆی ئەنجامدانی كودەتای سەربازی لەو وڵاتە هەیە.
ئاژانسی هەواڵی ئەسۆشییەیتد پرێس بڵاویكردەوە، بەرەبەیانی ئەمڕۆ دووشەممە هێزە ئەمنییەكانی سودان هەڵیانكوتاوەتەسەر ماڵی ڕاوێژكاری ڕاگەیاندنی سەرۆك وەزیران و ماڵەكەیان سوتاندووە و خۆیشیان دەستگیركردووە.
ئاماژەی بەوەشكردووە، “هێزە ئەمنییەكان پێنج بەرپرسی باڵای حكومەتیان دەستگیركردووە كە چواریان وەزیرن”.
هەر بەپێی زانیارییەكانی ئاژانسەكە، هێڵەكانی ئینتەرنێت لە خەرتومی پایتەخت ڕاگیراون و دەروازەكانی شارەكەش داخراون و ڕێگە بە هاتن و چوونەدەرەوەی هیچ كەسێك نادرێت.
هاوكات بەپێی هەواڵی میدیا عەرەبییەكان جووڵاندنی هێز بۆ ئەنجامدانی “كودەتای سەربازی” بووە، بەڵام تائێستا بە فەرمی حكومەتی كاتیی سودان هیچ شتێكی لەبارەوە بڵاونەكردووەتەوە.
