مامۆستایانی وانەبێژ لە بەشێک لە شار و شارۆچکەکانی هەرێمی کوردستان زیاتر لە هەفتەیەکە بەردەوامن لە گردبوونەوە و ناڕەزایی و ئەمڕۆ دەستەی مامۆستایانی وانەبێژ لەبەردەم ئەنجومەنی وەزیران وەرگرتنی هەموو بڕە پارەیەکی دیاریکراویان ڕەتکردەوە.
لە كۆنگرەیەكی ڕۆژنامەوانیدا دەستەی مامۆستایانی وانەبێژ داواکارییەکانی خستەڕوو و ڕایگەیاند، “هیچ بڕە پارەیەکی دیاریکراو قبوڵناکەن و تەنها دامەزراندنیان دەوێت”، داوایکرد یەک چین لەناو وەزارەتی پەروەردە هەبێت ئەویش مامۆستایانی دامەزراوبێت نەک “مامۆستایانی دامەزراو و مامۆستایانی وانەبێژ”.
نوێنەرانی مامۆستایانی وانەبێژ ئاماژەیان بەوەکرد، تائێستا هیچ لایەنێکی پەیوەندیدار وەڵامیان نەداونەتەوە و داوایان لە مەسرور بارزانی کرد بەدەم داواکارییەکانیانەوە بڕۆن.
مامۆستایانی وانەبێژ دەڵێن، “ئێمە بۆشاییەکی گەورەمان لە وەزارەتی پەروەردە پڕکردووەتەوە لەکاتێکدا هیچ مافێکمان پێنەدراوە، ئەرکمان زۆرە و مافمان نییە”.
لە هەرێمی کوردستان 22 هەزار مامۆستای وانەبێژ هەن و بەپێی وتەی نوێنەری دەستەی مامۆستایانی وانەبێژ، مامۆستا هەیە 14 ساڵە وانەبێژە و دانەمەزراوە.
