زیاد جەبار، رایگەیاند، “یەکێتی چاکسازی دەکات و هێزە ئەمنییەکانیش لەو چاکسازییە بەدەرنین، ئەو کەسانەی هێرشەکەیان ئەنجامدا دەستگیرکراون”.
زیاد جەبار، لێپرسراوی مەڵبەندی یەكی رێكخستنی سلێمانی و ئەندامی سەركردایەتیی یەكێتیی نیشتمانیی كوردستان لە چاوپێكەوتنێكی رۆژنامەوانیدا رایگەیاند، “لە دوێنێوە بافڵ جەلال تاڵەبانی، سەرۆكی یەكێتی لەسەر هێڵە و بڕیاریداوە لێكۆڵینەوە لەو بابەتە بكرێت كە روویدا”.
وتیشی، “ئەو كەسانەی هێرشەكەیان ئەنجامدا دەستگیركراون، من كێشەی كۆمەڵاتیەتیم لەگەڵ كەسدا نییە و كەسێكی حزبیم”.
زیاد جەبار ئەوەشی وت، “خەڵك لە دیاردەی چەكداری بێزاربووە، بەتایبەت لەنێو هێزە ئەمنییەكاندا لەبەر ئەوە بافڵ جەلال تاڵەبانی سەرۆكی یەكێتیی نیشتمانیی كوردستان بڕیاریدا لێكۆڵینەوە بكرێت و ئەو هێزانە رێكبخرێنەوە بە تایبەت لەڕووی چۆنییەتیی مامەڵەكردن لەگەڵ مرۆڤەكاندا و پێیان بوترێت سنووریان تاوەكو كوێیە”.
ئاماژەی بەوەشكرد، “یەكێتیی نیشتمانیی كوردستان لەدوای هەڵبژاردنەوە بڕیاریداوە چاكسازی لە زۆرینەی بوارەكاندا بكات و هێزە ئەمنییەكانیش بەدەر نین لەو چاكسازییانە و سەرۆكی یەكێتی رایسپاردم سەرۆكایەتیی لیژنەی چاكسازیی هێزە ئەمنییەكان بكەم”.
