بەهۆی گرانی نرخی بەنزینەوە، لە كەلار خۆپیشاندان دەستیپێكرد و خۆپیشاندەران و شۆفێران ڕێگای گەرمیان – سلێمانییان داخست.
پەیامنێری تۆڕی میدیایی ئێستا گواستیەوە، كەمێك لەمەوبەر لە قەزای كەلار بەشێك لە شۆفێران گردبوونەوە و وەكو ناڕەزاییەك لە دژی گرانبوونی نرخی بەنزین ڕێگای سەرەكیی گەرمیان- سلێمانییان داخست.
وتیشی، شۆفێرەكان داوا دەكەن نرخی بەنزین هەرزان بكرێت.
ماوەی چەند ڕۆژێكە بەهۆی گرانبوونی نرخی بەنزین، لە بەشێك لە شار و شارۆچكەكانی هەرێمی كوردستان شۆفێران و هاوڵاتییان ناڕەزایی دەردەبڕن و ئۆتۆمبێلەكانیان لەسەر شەقامەكان دەكوژێننەوە، یان ڕێگە سەرەكییەكان دادەخەن.
نرخی بەنزین لە هەرێمی كوردستان ماوەیەكە زیاتر بەرزبووەتەوە و نرخی لیترێك بەنزینی نۆرماڵ بە 900 دینار و موحەسەن بە 1000 دینار و بەنزینی سوپەریش بە 1050 دینار دەفرۆشێت، لە كاتێكدا پێشتر نرخەكەی زۆر كەمتربوو.
شۆفێرانی هەرێم ڕەخنەی ئەوە دەگرن، بەنزین لە ناوچە جێناكۆكەكان و پارێزگاكانی دیكەی عێراق، كە لە پاڵاوتگەكانی هەرێم دەپاڵێورێت و دەنێردرێت، بە 450 دینارە، بەڵام لە هەرێم نرخەكەی زیاتر لە دووهێندەیە.
