دادگای تێهەڵچوونەوەی سلێمانی دروستکردنی بەنزینخانەیەکیان لەناو پڕۆژەکەدا ڕاگرت كە لەبنەڕەتدا شوێنی سەوازیی بوو.
ڕەمەزان نامق، سەرۆکی لیژنەی پلان و پڕۆژەکان لە ئەنجومەنی پارێزگای سلێمانی لە ڕاگەیەندراوێكدا ئاماژەی بەوەكردووە،”دروستکردنی بەنزینخانەیەک لە ناو پرۆژەیەكی نیشتەجێبوون ناڕەزایەتی بەشداربووەکانی پرۆژەکەی لێکەوتەوە بەهۆی نزیکی لە یەکەنیشتەجێبوەکانيان”.
ڕوونیشیكردووەتەوە، “پرۆژەكە هۆكاری کەمکردنەوەی ڕێژەی سەوزایی بوو، جگەلەوەش ڕەزامەندی لایەنە پەیوەندیدارەکانی بۆ وەرنەگیرابوو مۆڵەتی کارکردنیشی نیە”.
سەرۆكی لیژنەكە جەختی لەوەشكردووەتەوە دوای هەوڵەكان، “دادگا فەرمانیکرد بە ڕاگرتنی کارکردن لە پڕۆژەکەدا و ڕێگەگرتن لە پڕکردنی خەزانەکانی بەنزینخانەکە”.
ئاشكراشیكردووە، لە ڕێگەی دادگای کارگێری سکاڵای یاساییان تۆمارکردووە بەرامبەر ئەو فەرمانگە و فەرمانبەرانە کەهۆکاربوون بۆ کارئاسانی لەدروستکرنی بەنزینخانەكە لەدەرەوەی یاسا و ڕێنماییەکان.
