وەزیری كارەبای عێراق، پلانی بەرزكردنەوەی نرخی كارەبای لەسەر هاوبەشانی وزەی كارەبا ئاشكراكرد و هۆكارەكەی بە پێویست ناوزەد دەكات.
بەپێی ڕاگەیەندراوی وەزارەتەكە، ئەمڕۆ دووشەممە عادل كەریم وەزیری كارەبای عێراق لەگەڵ شاندێكی وەزارەتی پیشەسازی و كانزاكاریدا كۆبووەتەوە و هەردوولا ڕێككەوتوون وەزارەتی پیشەسازی وێستگە و گۆڕەر و ئامێرەكانی كارەبا چاكبكاتەوە.
عادل كەریم كە كوردە و ماوەیەك لەمەوبەر ڕاسپێردرا پۆستی وەزیری كارەبا بگرێتەدەست، لە كۆبوونەوەكەدا ڕایگەیاندووە، وەزارەتی كارەبا كۆمەڵێك ڕێوشوێن دەگرێتەبەر بۆ زیادكردنی داهات، نرخی كارەبا بەرزدەكاتەوە و نرخێكی هاوسەنگ و پشتیوانیكراو دیاریدەكەن كە كاریگەرییەكی گەورەی دەبێت لە زیادكردنی داهاتی وەزارەتی كارەبادا.
ڕوونیشیكردووەتەوە كە ئامانجیان لە زیادكردنی داهاتی وەزارەتەكەیان، فراوانكردنی هەندێك پڕۆژەی كارەبایە بەتایبەت لە كەرتی دابەشكردندا.
