ڕاوێژکارێكی سەرۆک وەزیرانی عێراق ڕایدەگەیەنێت، ئەنجامی جیاکردنەوەی دەنگەکان بە شێوەی دەستی لەگەڵ ئەنجامەکانی ئەلیکترۆنی 100% هاوتا بوون و هیچ گۆڕانکارییەک بەسەر ئەنجامەکانی هەڵبژاردندا دروستناكات.
عەبدولحسێن ئەلهنداوی، ڕاوێژكاری سەرۆك وەزیرانی عێراق بۆ كاروباری هەڵبژاردن لە ڕاگەیەندراوێكدا ئاماژەی بەوەكردووە، پرۆسەی جیاکردنەوەی دەستیی دەنگەکان لە هەموو بازنەکانی هەڵبژاردن تەواوبووە و ئەنجامە بەدەستهاتووەکانی جیاکردنەوەكەش كە بەشێوەی دەست ئەنجامدرا، هاوتابوو بە ئەنجامە جیاکراوەکان.
باسیلەوەشكرد، ئەنجامی جیاکردنەوەی دەنگەکان بە شێوەی دەستی لەگەڵ ئەنجامەکانی ئەلیکترۆنی 100% هاوتا بوون و هیچ گۆڕانکارییەک بەسەر ئەنجامەکانی هەڵبژاردندا دروستناكات.
قسەكانی ڕاوێژكارەكەی كازمی دوای ئەوەدێت، ئەمڕۆ کۆمسیۆنی باڵای سەربەخۆی هەڵبژاردنەكان باسیلەوەكردبوو، توانیویانە 95% پرۆسەی جیاکردنەوەی دەنگەکان بە دەست تەواو بکەن، کە زیاتربوون لە سێ هەزار و 681 وێستگە، ئەنجامەکانیان ڕاستەوخۆ نەگەیشتبووە دەستیان و لایەنەکان سکاڵایان لەبارەی ئەنجامەکانیانەوە هەبوو.
