نرخی غازی شل لە چەند شارێكی هەرێمی كوردستان بەرزبووەتەوە و بریكارێكی دابەشكردنی غاز، هۆكارەكەی بۆ ئێستا ئاشكرادەكات و پێشبینی دەكات لە چەند ڕۆژی داهاتوودا لە سلێمانی-ش نرخی غاز بەرزببێتەوە.
جەبار عوسمان، بریكاری دابەشكردنی غازی ماڵان لە سلێمانی بۆ تۆڕی میدیایی ئێستا دوا و ڕایگەیاند، نرخی غازی شل بەرزبووەتەوە و یەك تۆنی بووە بە یەك ملیۆن و 150 هەزار دینار.
وتیشی، “لە ماوەی 22 ساڵی ڕابردوودا، هیچكات نرخی غازی شل هێندە بەرزنەبووەتەوە و نەگەیشتووە بەم نرخەی ئێستای”.
ئەو بریكارەی دابەشكردنی غازی ماڵان ئاماژەی بۆ ئەوەشكرد كە هێشتا “بوتڵێك غاز لە سلێمانی بە 8500 دینارە و كارگەكان بە 7500 دینار دەیدەن بە بریكارەكان، بەڵام لە هەولێر و دهۆك نرخەكەی بەرزبووەتەوە”.
لەبارەی هۆكاری بەرزبوونەوەی نرخی غازەوە، جەبار عوسمان ئاشكرایكرد كە كارگەكانی غاز لە غازی شل خاڵیبوونەتەوە و ئەوەی ماوە زیاتر ئەو غازەیە كە لای بریكارەكان و فرۆشیارانە.
بریكارەكەی دابەشكردنی غازی ماڵان پێشبینیكرد لە دوو بۆ سێ ڕۆژی داهاتوودا غاز لە سلێمانی گران ببێت و نرخی هەر بوتڵێكی بۆ 14 هەزار دینار و زیاتر بەرزببێتەوە.
