وەزیری دەرەوەی ئەمریكا پشتیوانیی وڵاتەكەی بۆ لیبیایەكی یەكپارچە و ئارامی دوور لە دەستتێوەردانی دەرەكی دووپاتكردەوە، داوای چوونەدەرەوەش لە هێزە بیانی و گروپەكانی نێوخاكی ئەو وڵاتە دەكات.
لە ڕاگەیەندراوێكدا وەزارەتی دەرەوەی ئەمریكا ئاماژەی بەوەكردووە، ئەنتۆنی بلینكن بەشداریی كۆبوونەوەی وەزاریی لە بارەی دۆخی لیبیاوە كرد، كە بە دەستپێشخەریی فەرەنسا و بە بەشداریی ئەمریكا، ئیتاڵیا و ئەڵمانیا بووە.
بەپێی ڕاگەیەندراوەكە، بلینكن باسی لەوەكردووە، ئەمریكا پشتیوانیی هەڵبژاردنی پەرلەمان و سەرۆكایەتیی لیبیا دەكات، كە لە 24ی كانونی یەكەمدا بەڕێوەدەچێت.
داواشی لە سەركردەكانی لیبیا كرد، هەنگاوەكانیان بۆ بەڕێوەچوونی هەڵبژاردنێكی ئازاد و بێگەرد دەستپێبكەن و لەسەر بنەمای دەستوور و یاساكانی وڵاتەكە گفتوگۆیەكی نیشتمانی ئەنجامبدەن.
وەزیری دەرەوە ئەمریكا جەختی لەوەشكردووەتەوە، وڵاتەكەی لەگەڵ چوونەدەرەوەی تەواوی هێزە بیانییەكان و گروپە چەكدارییەكانە لە لیبیا.
بلینكن، پشتیوانیی وڵاتەكەشی بۆ لیبیایەكی یەكپارچە و ئارامی دوور لە دەستێوەردانی دەرەكی دووپاتكردەوە.
