ئەمڕۆ تەرمی كەسێك لە هۆتێلێكی هەولێر دۆزرایەوە، قوربانییەكە عەرەبە و بۆ زانینی هۆكاری گیانلەدەستدانەكە ڕەوانەی پزیشكی داد كراوە.
پۆلیسی هەولێر لە ڕاگەیەندراوێكدا ئاشكرایكردووە، “ئەمڕۆ کاتژمێر 11:30 خولەكی پێشنیوەڕۆ، هێزەکانی بەڕێوەبەرایەتیی پۆلیسی پارێزگای هەولێر ئاگادارکرانەوە بەبوونی تەرمێک لە هۆتێل (سۆما) لە شەقامی سوڵتان مزەفەر”.
پۆلیسی هەولێر دەڵێت، دوای لێكۆڵینەوە دەركەوتووە تەرمەكە هی كەسێكی بەڕەگەز عەرەبە بەناوی (ئەحمەد ئیبراهیم محەمەد)، تەمەن (٥٢) ساڵ بووە و خەڵکی موسڵە، لە بازاڕی لەنگەی شاری هەولێر کاریدەکرد وە بەتەنها لە هۆتێلی ناوبراو ژیاوە.
تەرمەکە ڕەوانەی پەیمانگای پزیشکی داد کراوە بۆ ئەوەی هۆکاری مردنەکەی بزاندرێت، پەڕاوی لێکۆڵینەوەش بۆ ڕووداوەکە كراوەتەوە.
