ئەمڕۆ چوارشەممە 15ی ئەیلولی 2021 بە سەرۆکایەتیی مەسرور بارزانی سەرۆکی ئەنجومەنی وەزیران و ئامادەبوونی قوباد تاڵەبانی جێگری سەرۆک وەزیران، ئەنجومەنی وەزیرانی هەرێمی کوردستان کۆبوونەوەی هەفتانەی ئەنجامدا و چەند بابەت و پرسێكی گشتی تاوتوێكران.
بەگوێرەی ڕاگەیەندراوی كۆبوونەوەكە، لە دەستپێکی ئەو کۆبوونەوەیەدا سەرۆک وەزیران تیشکی خستەسەر ئامادەکارییەکانی هەڵبژاردنی پەرلەمانی عێراق و جەختیکردەوە کە پێویستە هەڵمەتی بانگەشەی هەڵبژاردن، بەشێوەیەکی ئارام و شارستانییانە و دوور لە ناوزڕاندن و یەکترشکاندن بەڕێوەبچێت.
ئاماژەی بەوەشکرد، “ئەم هەڵبژاردنە، بۆ ئەوەیە نوێنەرانی هەرێمی کوردستان لە بەغداد، داکۆکی لە بەرژەوەندییە گشتییەکان و ماف و شایستەکانی خەڵکی کوردستان بکەن و پێویستە ململانێ و کێبەرکێیی نێوان حزب و لایەنە کوردستانییەکانیش، بەئاراستەی بەرگریکردن بێت لە پرسە نیشتمانییەکان و مافەکانی گەلی کوردستان”.
“ئەنجومەنی وەزیران جەختی لە گرنگیی ڕۆڵی بێلایەنانەی دامودەزگا ئیداری و ئەمنییەکانی حکومەتی هەرێم و میدیا و ڕێکخراوەکانی کۆمەڵگەی مەدەنی کردەوە لە سەرخستنی پرۆسەی هەڵبژاردن بەگوێرەی یاسا بەرکارەکان، بەشێوەیەک پێویستە ئامانجی سەرەکیی هەموو حزب و لایەنە کوردستانییەکان ئەوە بێت، لە بەغداد بەیەکەوە داکۆکی لە مافە دەستوورییەکانی هەرێمی کوردستان و بەرژەوەندییە باڵاکانی خەڵک بکەن”، وەك ڕاگەیەندراوەكە ئاشكرایكردووە.
پاشان لەلایەن ڕێبەر ئەحمەد وەزیری ناوخۆ و وەزیرە پەیوەندیدارەکان، هەنگاوەکانی جێبەجێکردنی چەند بڕیارێکی ئەنجومەنی وەزیران خرانەڕوو کە تایبەتبوون بە قەدەغەکردنی سیمکارتی بێبەرایی و ئەنجامی لێکۆڵینەوە لە کوالێتیی ئاردی هاوردەکراو لە دەرەوەی هەرێمی کوردستان لەڕووی خۆراکی و تەندروستییەوە. ئەنجومەنی وەزیران جەختیکردەوە لە زووجێبەجێکردنی ئەو بڕیارانە.
بڕگەیەکی دیکەی کۆبوونەوەکە كە ڕاگەیەندراوەكە دەیخاتەڕوو، تایبەت بووە بە بڕیاردان لەسەر ڕەشنووسی ( پلانی نیشتمانیی هەرێمی بۆ مافەکانی مرۆڤ 2021 – 2025 ) کە لە کۆبوونەوەی پێشووی ئەنجومەن خرایەڕوو، لە کۆبوونەوەکەدا بەکۆی دەنگی ئەنجومەنی وەزیران پەسەندکرا و وەزارەت و لایەنە پەیوەندیدارەکان ڕاسپێردران بۆ جێبەجێکردنی پلانەکە و ئاگادارکردنەوەی ئەنجومەنی وەزیران لە بەرەوپێشچوونی جێبەجێکردنی پلانەکە بە ئاراستەی برەودان بە مافەکانی مرۆڤ لە هەرێم.
ڕاگەیەندراوی كۆبوونەوەی ئەنجومەنی وەزیران دەڵێت، “لەکۆتایی کۆبوونەوەکەدا، دانا عەبدولکەریم وەزیری ئاوەدانکردنەوە و نیشتەجێکردن، ڕەشنووسی (پەیڕەوی سندوقی پاڵپشتیی گەشەپێدان ڕێگاوبان لە هەرێمی کوردستان )ی خستەڕوو، كە لەلایەن وەزارەتی ئاوەدانکردنەوە و نیشتەجێکردن بەهەماهەنگیی وەزارەتە پەیوەندیدارەکان ئامادەکراوە”.
“ئەنجومەنی وەزیران، سەرەڕای جەختکردنەوە لە گرنگیی برەودان بە بواری ڕێگاوبان، بڕیاریدا وەزارەتە پەیوەندیدارەکان لەماوەی مانگێکدا، پێداچوونەوەی زیاتر بە ڕەشنووسەکەدا بکەن لەڕووی یاسایی و تەکنیکی و داراییەوە، لەبەر ڕۆشنایی ئەو تێبینی و سەرنجانەی خرانەڕوو، تا ئەو پەیڕەوە ئامانجەکانی خۆی بەدیبهێێت لە پاڵپشتیی وەزارەت لە گەشەپێدانی پڕۆژەکانی ڕێگاوبان و دانانی پێوەر بۆ بەرجەستەکردنی دادپەروەری لە دابەشکردنی پڕۆژەکانی ئاوەدانکردنەوە و ڕێگاوبان، لەسەر پارێزگا و ئیدارە سەربەخۆکان بەپێی شایستەبوون”، لە ڕاگەیەندراوەكەدا واهاتووە.
