پۆلیسی ئیسرائیل ڕایدەگەیەنێت، چوار لەو شەش بەندكراوە فەڵەستینییەی هەفتەی ڕابردوو لە بەندیخانەیەك هەڵاتن، دەستگیركراونەتەوە.
پاش پێنج ڕۆژ گەڕان و پشكنین و پڕۆسەی ئەمنی، هێزەكانی پۆلیسی ئیسرائیل ئێوارەی دوێنێ دوو لەو بەندكراوانەیان دەستگیركرد، كە هەفتەی ڕابردوو لە بەندیخانەی جلبوع هەڵاتن.
ئەو بەندكراوانە بریتین لە هەریەك لە مەحمود عەبدوڵا عارزە (46 ساڵ) كە لە ساڵی 1996ــەوە دەستبەسەرە و سزای بەندكردنی تاهەتایی لەسەرە، هەروەها یەعقور مەحمود قادری (49 ساڵ) كە لە ساڵی 2003ــوە دەستبەسەرە و بە تاهەتایی سزادراوە.
بەیانی ئەمڕۆش دوو بەندكراوی دیكە بەناوەكانی زەكەریا زوبەیدی و محەمەد عارضە لە باكووری ئیسرائیل لەلایەن هێزەكانی پۆلیسەوە دەستگیركرانەوە.
بەپێی وتەی وتەبێژی پۆلیس ئەو دوو بەندكراوە لە گوندی (ئوم غەنەم) دەستگیركراون لەكاتێكدا لە گۆڕەپانێكی وەستانی پاس خۆیان حەشاردابوو.
س: میدیاكانی ئیسرائیل
