چەکدارانی داعش لە نزیک ناحیەی گوڵاڵەی سەر بە قەزای خانەقین هێرشێکیان ئەنجامدا و بەهۆیەوە ژمارەیەک ئەندامی هێزە عێراقییەکان برینداربوون.
سەرچاوە ئەمنییەکانی عێراق ئاشکرایانکرد، چەکدارانی داعش درەنگانی شەوی ڕابردوو هێرشێکیان بۆسەر فیرقەی یەک لە لیوای یەکی سوپای عێراق لە ناوچەی حەلوانی نێوان گوڵاڵە و خانەقین ئەنجامدا.
دوای ئەوەی هێزێکی دیکەی عێراقی بۆ پشتیوانیکردن دەچنە شوێنی هێرشەکە بۆمبێکی چێندراو بەو هێزە عێراقییەدا تەقیوەتەوە و بەهۆیەوە چەند سەربازێکی عێراقی برینداربوون، یەکێک لەوانە ئەفسەرێکە بە پلەی موقەدەم.
ئەمە لەکاتێکدایە شەوی دووشەممە هێزێکی ئۆپەراسیۆنە هاوبەشەکان و دژەتیرۆری عێراق هێرشێکیان بۆسەر چەکدارانی داعش لە سنووری کەرکوک ئەنجامدا و بەهۆیەوە چوار چەکداری داعش کوژران.
