مەسرور بارزانی، ئەمڕۆ 20ی تشرینی یەکەم، ڕێگای جووتسایدی ڕووڤیا- گۆپاڵی کردەوە و ڕایگەیاند ئەمە یەکێکە لە پرۆژە ستراتیجییەکان و ئەم پرۆژانە گرنگن و بەردەوامیشیان دەبێت، چونکە خەڵک تەنها موچەی ناوێت بەڵکو پرۆژەی خزمەتگوزاریشی دەوێت.
مەسرور بارزانی وتیشی، ئەم ڕێگایە جگە لەوەی ئاسانکارییەکی باشە بۆ هاتوچۆی هاوڵاتییان، ڕێگایەکیشە بۆ ئاڵوگۆڕی بازرگانی و ئاسانترکردنی ئاڵوگۆڕەکان.
سەبارەت بە دابەشکردنی موچە و ئەو بڕە پارەیەی بۆ پرۆژەکان تەرخاندەکرێت، سەرۆکی حکومەتی ڕونیکردەوە کە پرۆژەکان قورسایی زۆری دەکەوێتە سەر کۆمپانیاکانی کەرتی تایبەت، ئێمە لە حکومەتی هەرێم خەرجییەکانمان بۆ کەمترین ئاست کەمکردووەتەوە بەڵام بڵاوبوونەوەی کۆرۆنا و ئەو قەیرانە داراییەی ڕووی لە هەرێمی کوردستان کردووە هۆکارێکە بۆئەوەی نەتوانین پرۆژەکانیش لەکاتی خۆیدا جێبەجێ بکەین.
مەسرور بارزانی دەڵێت، “خەڵک دەڵێن بۆ موچە دابەشناکەن و پارە بۆ پرۆژە خەرجدەکەن، حکومەتی هەرێم بەپێی ئەو توانایەی هەیەتی کەمتەرخەمی نەکردووە و نایکات بۆ دابەشکردنی موچە، لەگەڵئەوەشدا خەڵک تەنها موچەی ناوێت بەڵکو قوتابخانە، نەخۆشخانە و ڕێگاوبان و پرۆژەی خزمەتگوزارییان دەوێت، چونکە هەموو هاوڵاتییانی هەرێمی کوردستان موچەخۆر نین و ئەوانیش مافیان هەیە لەسەرمان و دەبێت خزمەتیان بکەین”.
جووتسایدی ڕووڤیا – گۆپاڵ یەکێکە لە پرۆژە ستراتیجییەکانی حکومەتی هەرێمی کوردستان لە بواری ڕێگەوبان، درێژی ڕێگاکە 22 کیلۆمەتری جووتسایدە ( سێ هێلی هاتن و سێ هێڵی چوون ) لە گەڵ شەش ئۆڤەرپاس و پردێک و سێ کیلۆمەتری هاتووچۆی خێرا ( ئۆتۆبان ) لەخۆدەگرێت.
