دوای ئەوەی دوو کارمەندی وەزارەتی کارەبا بەهۆی کارەباگرتنەوە دەستەکانیان لەدەستدان، وەزیری کارەبای هەرێم بڕیاریداوە، هەر کارمەندێک کەلوپەلی خۆپارێزی بەکارنەهێنێت سزا دەدرێت.
کەمال محەمەد، وەزیری کارەبای هەرێم لە کۆبوونەوەیەکدا لەگەڵ بریکاری وەزارەت و بەڕێوەبەرانی گشتیی دیوان و گواستنەوە و دابەشکردنی کارەبا ڕایگەیاند، “بەهیچ شێوەیەک ڕێگەنادەین کەمتەرخەمی لە پاراستنی گیانی فەرمانبەرانی وەزارەت لەوانە تیمەکانی چاککردنەوە بکرێت”.
وەزارەتی کارەبا ئاشکرایکردووە، ”هەر بەڕێوەبەر یان فەرمانبەرێکی وەزارەت لە میانەی جێبەجێکردنی کارەکانیدا، کەلوپەلی خۆپارێزیی پیشەیی بەکارنەهێنت، لە بەرانبەر پاراستنی گیانی خۆی و هاوکارانی کەمتەرخەمی بنوێنێت و پابەندی ڕێنماییەکان نەبێت لێى قبوڵ ناكرێت، وەزارەت بۆ پاراستنی گیانی فەرمانبەر و تیمەکانی، هەموو ڕێوشوێنێک دەگرێتەبەر و ڕێگە بەهیچ جۆرە خەمساردی و پابەندنەبوونێک بە ڕێنماییەکان نادرێت و بە توندیش چاودێریی پرۆسەکانی خۆپارێزیی پێشەیی دەکرێت”.
ئەم بڕیارەی وەزارەتی کارەبا دوای ئەوە دێت ڕۆژی 7ی ئەم مانگە، کارمەندێکی تیمی کارەبای چەمچەماڵ بەناوی (کەریم عەبدولحەمید) لەکاتی کارکردندا بەهۆی هەڵەیەکەوە تەزووی کارەبا لێیدا و هەردوو دەستی لەدەستدان.
ئەمساڵ ئەوە دووەم حاڵەتی برینداربوونی کارمەندانی کارەبایە و پێنج مانگ پێش ئێستاش کارمەندێکی بەڕێوەبەرایەتیی کارەبای سلێمانی بەهۆی تەزووی کارەباوە دەستێکی لە دەستدا.
