وەزارەتی دەرەوەی عێراق ڕایگەیاند، هەماهەنگیی تەواویان کردووە بۆ گەڕانەوەی 240 پەنابەری عێراقی، کە لە نێوان وڵاتانی بیلاڕوسیا و لیتوانیا-دا گیریانخواردووە.
بەپێی ڕاگەیەندراوێکی وەزارەتی دەرەوەی عێراق، هەموو ڕێکارە یاساییەکان تەواوبوون بۆئەوەی لە (مینسک)ی پایتەختی بیلاڕوسیا-وە بە هێڵی ئاسمانیی عێراقی ئەو پەنابەرانە بگەڕێندرێنەوە.
دوایین ئامارەكان ئاشكرای دەكەن كە زیاتر لە هەزار و 500 عێراقی لە سنووری لیتوانیا و بیلاڕوسیا، بەهۆی داخستنی سنوورەوە گیریان خواردووە و حكومەتی عێراق-یش هاوكاریكردنی ئەو كۆچبەرانەی دەستپێكردووە.
دوای گرتنەبەری ڕێکارەکان لەلایەن بیلاڕوسیا و لیتوانیا-وە گەشتکردن بۆ ئەو دوو وڵاتە کەمیکردووە، ئەمەش لەلایەن یەکێتیی ئەوروپا-وە پشتڕاستکراوەتەوە.
ماوەی زیاتر لە دوو مانگە بەشێک لە عێراقییەکان دەیانەوێت لەڕێگەی بیلاڕوسیا-وە خۆیان بگەیەننە یەکێک لە وڵاتانی ئەوروپا و لیتوانیاش یەکێک بوو لەو وڵاتانەی عێراقییەکان بۆ گەیشتن بە ئەوروپا بەکاریان دەهێنا.
