ڕەجەب تەیب ئەردۆغان سەرۆک کۆماری تورکیا کۆنترۆڵکردنی 196 ئاگری وڵاتەکەی لەکۆی 208 ئاگری دارستانەکانی تورکیا ڕاگەیاند، دڵنیاییدا کە هەموو هەوڵەکانیان بۆ ڕوبەڕووبوونەوەی ئاگرەکان دەخەنەگەڕ.
تائێستا 208 ئاگر لە 44 ناوچەی تورکیا کەوتوونەتەوە و تائێستا نەتوانراوە بەتەواوی کۆنترۆڵ بکرێت لەکاتێکدا ڕووی ڕەخنە و ناڕەزاییەکان لە سەرۆک کۆماری تورکیایە بەوەی تواناکانی وڵاتەکەی لەدابینکردنی کەرەستەی پێویستی ئاگرکوژێنەوە وەک پێویست نین.
لە دوای ئەنجامدانی نوێژی هەینی ئەمڕۆ ڕەجەب تەیب ئەردۆغان ڕایگەیاند، “هەموو تواناکانمان دەخەینەگەڕ بۆ کۆنترۆڵکردنی ئەو ئاگرەی لە دارستانەکانی وڵاتەکەماندا کەوتووەتەوە”.
ئاماژەی بەوەشکرد، تیمەکانی ئاگرکوژێنەوەی وڵاتەکەی ئێستا هەموو هەوڵەکانیان بۆ کوژاندنەوەی ئەو 12 ئاگرە خستووەتەگەڕ کە لەهەریەکە لە ئەنتالیا، مۆگلا و چەند ناوچەیەکی دیکە ماون.
ڕایگەیاند، چوار هێڵیکۆپتەریان لە ئۆکرانیاوە پیگەیشتووە کە دەتوانن بەبەردەوامی 24 کاتژمێر کاریان پێبکەن.
لە ماوەی ڕابردوودا ئاگرێکی زۆر لە ناوچەکانی باشوور و باشووری ڕۆژئاوای وڵات کەوتەوە و تائێستا بەوهۆیەوە شەش کەس گیانیان لەدەستداوە و دەیان کەسیش برینداربوون.
