هاوسەرۆکی یەکێتیی نیشتمانیی کوردستان ڕایگەیاند، ڕێککەوتنەکەیان لەگەڵ بزوتنەوەی گۆڕان بۆ سلێمانییەکی باشتر و کوردستانێکی باشترە و هیوادارین ئەنجامە باشەکەی لە دوای هەڵبژاردن دەربکەوێت.
بافڵ تاڵەبانی، هاوسەرۆکی یەکێتیی نیتشتمانیی کوردستان لە مەراسیمی واژووکردنی ڕێککەوتنامەی نێوان حزبەکەی و بزوتنەوەی گۆڕاندا ڕایگەیاند، “واژووکردنی هاوپەیمانیی کوردستان بەدیهێنانی خەونەکانی مام جەلال و نەوشیروان مستەفایە و ئێمە جارێکی دیکە خوشک و برایانمان لە بزووتنەوەی گۆڕان جێناهێڵین”.
بافڵ تاڵەبانی، هاوسەرۆکی یەکێتی ڕاشیگەیاند، “ڕۆحیەتی پێکەوە کارکردن گرنگە بۆ تەواوکردنی بەرنامەی هەردوولامان و کارەکەی ئێمەش بۆ بەهێزکردنی زیاتری کوردە لە بەغداد”.
هاوکات لاهور شێخ جەنگی، هاوسەرۆکی یەکێتیی نیشتمانیی کوردستان لە کاتی واژووکردنی ڕێککەوتنامەکەدا وتی، “پاراستنی هاوپەیمانیی کوردستان لە هەموو شتێک گرنگترە و دەبێت وەک چاومان پارێزگاری لێبکەین”.
ئاماژەی بەوەشکرد، “هەوڵدەدەین ئەم ڕێککەوتنە نمونەیەکی جوانی سیاسی بێت بۆلایەنە سیاسییەکانی دیکەش و چەترێک بێت بۆ کۆکردنەوەی کۆی توانا و ئامانجە سیاسییەکانمان”.
