هاوپەیمانیی فەتح بە سەرۆكایەتیی هادی عامری دەڵێت، “پلانێكی گەورە بە سەرۆكایەتیی بارزانی و كازمی و پشتیوانیی باڵیۆزخانەی ئەمریكا هەیە بۆ لاوازكردنی حەشدی شەعبی و كۆنترۆڵكردنی “ناوچە ڕزگاركراوەكان” لەلایەن كورد-ەوە.”
عەبدلئەمیر مەیاحی، ئەندامی هاوپەیمانیی فەتح ئەمڕۆ پێنجشەممە 15ی تشرینی یەكەم لە لێدوانێكی ڕۆژنامەوانییدا ڕایگەیاند، “حەشدی شەعبی بوو بە بەربەرستێك لەبەردەم چەندین پیلانگێڕییدا كە بۆ دابەشكردنی عێراق و داگیركردنی لەلایەن باندە تاوانكارەكانەوە داڕێژرابوون.”
وتیشی، “مەسعود بارزانی پیلانگێڕییەكی گەورە لەگەڵ مستەفا كازمی سەرۆكوەزیراندا بەڕێوەدەبات بۆ لاوازكردنی حەشدی شەعبی، باڵیۆزخانەی ئەمریكا لە بەغداد-یش پشتیوانیی لەو پیلانگێڕییە دەكات.”
بە گوتەی مەیاحی، پیلانگێڕییەكە بریتییە لە دەركردنی حەشد لە “ناوچە ڕزگاركراوەكان” و گەڕاندنەوەی كورد بۆ ئەو ناوچانە.
ئەندامەكەی هاوپەیمانیی فەتح ئاماژەی بۆ ئەوە كردووە كە “پیلانگێڕییەكە بە ڕێككەوتننامەی شنگال دەستیپێكردووە و بە ڕادەستكردنی هەموو ناوچە جێناكۆكەكان بە بارزانی و لاوازكردنی ڕۆڵی حەشدی شەعبی كۆتایی پێدێت.”
