وەزارەتی پەروەردەی هەرێمی کوردستان، ئەمڕۆ پێنجشەممە 15ی تشرینی یەکەم ڕایگەیاند، پێویستە دامەزراندن لە باخچە، خوێندنگە و پەیمانگا ناحکومییەکاندا بە ڕێژەی 80% بۆ دەرچووانی دانەمەزراو تەرخانبکرێت.
لە نوسراوێکدا کە واژووی وەزیری پەروەردەی هەرێمی کوردستان ، ئالان حەمە سەعیدی لەسەرە هاتووە، “باخچەی ساوایان، خوێندنگە و پەیمانگا ناحکومییەکان دەبێت بە ڕێژەی 80%ی دامەزاندنی مامۆستایان بۆ دەرچووانی دانەمەزراو تەرخان بکەن، دەشتوانن بە ڕێژەی 20% سود لە مامۆستایانی حکومی وەربگرن”.
لە نوسراوەکەدا ئاماژە بەوەکراوە کە بە چەند مەرجێک دەتوانن سود لە مامۆستایانی حکومی وەربگرن کە بریتیین لە، “1- بەشێوازی خواستن، 2- مۆڵەتی بێموچە، 3- تەواوکردنی بەشە وانەی مامۆستا لە قوتابخانە و پەیمانگای حکومی”.
وەزارەتی پەروەردە سەرجەم سەرپەرشتیارانی پەروەردەکان ئاگادار دەکاتەوە کە پابەندبن بە چاودێریکردنی جێبەجێکردنی ڕێنماییەکان لە حاڵەتی سەرپێچیکردن ئەو خوێندنگە و پەیمانگا ناحکومییانە هەروەها مامۆستاکانیش سزای کارگێڕی و دارایی دەدرێن.
