فەرماندەی گشتیی هێزەكانی سوریای دیموكرات پشتیوانی داواكەی سوید بۆ كشانەوەی هێزەكانی توركیا لەناو خاكی سوریا دەكات.
عەبدی لە تویتێكدا، كە درەنگانی شەوی ڕابردوو چوارشەممە 14ی تشرینی یەكەم بڵاویكردووەتەوە، دەشڵێت، “پشتیوانی داواكەی سوید لە توركیا دەكەین دەربارەی كشانەوەی هێزەكانی لە سوریا و كاركردن لەسەر چارەسەرێكی سیاسی كە ڕێز لە یەكێتیی خاكی سوریا و هەمەڕەنگییە سیاسییەكەی بگرێت”.
ڕۆژی سێشەممە ئان لیندا، وەزیری دەرەوەی سوید سەردانی توركیا-ی كرد و لە كۆنگرەیەكی ڕۆژنامەوانیدا لەگەڵ مەولود چاوش ئۆغڵو، وەزیری دەرەوەی ئەو وڵاتە داواكاریی وڵاتەكەی و یەكێتیی ئەوروپای دووبارەكردەوە بۆ كشانەوەی توركیا لە ڕۆژئاوای كوردستان و وتی، “هەڵوێستی بەهێزی یەكێتیی ئەوروپا وەكو خۆی ماوە، بەردەوامین لە هاندانی توركیا بۆ كشانەوە”.
ئان لیندا وتیشی، “یەكێتیی ئەوروپا چاوەڕوانە توركیا هەنگاوی بونیادنەرانە بنێت سەبارەت بە دیموكراسی و مافی مرۆڤ”.
