ئەمڕۆ 14 ی حوزەیران، قەدەغەی ڕاوەماسی کۆتاییهات و بەپێی ئەو ڕێنماییانەی وەزارەتی کشتوکاڵی حکومەتی هەرێم دایناوە، ڕاوچیان دەتوانن لە ئەمڕۆوە ڕاوەماسی بکەن.
لەسەر ئەو پرسە بێستون عەزیز، وتەبێژی پۆلیسی دارستان و ژینگەی ڕاپەڕین بە تۆڕی میدیایی ئێستای ڕاگەیاند، “ئەمساڵیش وەک ساڵانی دیکە پۆلیسی دارستانی ڕاپەڕین ئەرکی چاودێریکردنی خۆی بۆ جێبەجێکردنی قەدەغەی ڕاوەماسی ئەنجامدا، ئەمساڵ بۆ ئێمە ساڵێکی جیاوازتریشە، چونکە ئاستی ئاو دابەزیوە و حکومەتی ئێران ئاوی زێی بچووکی کەمکردووەتەوە”.
بە پێی وتەی وتەبێژی پۆلیسی دارستان و ژینگەی ڕاپەڕین، لە شەوی ڕابردووەوە ڕاوچیانی دەربەندی ڕانیە دەستیان کردووە بە ڕاوەماسی لە دەربەندەکە، دووپاتیشیدەكاتەوە، ڕێگە لە هەرکەسێکیش دەگرن بەپێی ڕێنماییەکان ڕاوی ماسی نەکات.
لەگەڵ هەڵگرتنی قەدەغەی ڕاوەماسی، ڕاوچیان بۆ ئەمساڵ لە وەرزی کەمی ئاو و وشکەساڵیدا ڕاودەکەن، کە بەپێی وتەی پسپۆران، کەمبوونەوەی ڕێژەی ئاو کاریگەری لەسەر سامانی ماسی هەبووە.
ڕاوچیانی ماسی لە ئەمڕۆوە ڕێگەیان دەدرێت بە قولاپ و تۆڕی گەورە، ڕاوی خۆیان دەستپێبکەن، واتە بۆیان نییە پەنجەماسی ڕاو بکەن ، لەگەڵ ئەوەش لە هەموو کاتێکدا ڕاوکردن بە کارەبا و تەقەمەنی و ماددەی ژەهراوی قەدەغەیە.
