وەزارەتی بەرگریی تورکیا لەماوەی 24 کاتژمێری ڕابردوودا، کوژرانی ئەفسەرێک و سێ ئەندامی سوپای ڕاگەیاندووە.
بەپێی ڕاگەیەندراوەکەی وەزارەتی بەرگریی تورکیا ئەو ئەفسەر و ئەندامانەی سوپا ڕۆژی سێی حوزەیران کوژراون، کە هاوکاتە لەگەڵ بەردەوامی پێکدادانەکانی گەریلاکانی پەکەکە و سوپای تورکیا لە سنوری هەرێمی کوردستان.
ڕاگەیاندنی کوژرانی سەربازەکان لە کاتێکدایە، دوێنێ هێزەکانی پاراستنی گەل – هەپەگە ڕایگەیاند، گەریلا سوپای توركیای ناچاركردووە لە سێ ناوچەی ئاڤاشینی باشووری كوردستان بكشێتەوە، بۆیە بەئەنقەست بە بۆمبی ئاگرین شوێنی هاوڵاتییانی مەدەنی بۆردوومان دەكات و زەویوزاریان دەسوتێنێت.
ناوەندی ڕاگەیاندن و چاپەمەنیی هێزەکانی پاراستنی گەل، كە باڵی سەربازیی پەكەكەیە، لە ڕاگەیەنراوەکەدا، ئاشكرایكردووە، سوپای توركیا لە دوو ڕۆژی ڕابردوودا “لە ناوچەکانی دۆڵی ماران، تابووری عەرەبەکان و دۆڵی کۆنفرانس لە هەرێمی ئاڤاشین، هەندێک پاشەکشەیان کردووە”.
هەپەگە هۆكاری پاشەكشەكەی توركیای بۆ چالاكییەكانی گەریلا لەو ناوچانەدا گەڕاندووەتەوە.
