بەشێک لە سەربازانی سوپای تورکیا بەیانیی ئەمڕۆ چوونەتە ناو گوندی هرورێ لە ناوچەی کانی ماسێ و دواتر گوندەکەیان چۆڵکردووە.
بەپێی وتەی دانیشتووانی گوندی هرورێ ئەو سەربازانەی تورکیا بە پیادە چونەتە ناو گوندەکەیان و پرسیاری بوونی پەکەکەیان لە ناوچەکەدا کردووە و دوای نیو کاتژمێر گوندەکەیان بەجێهێشتووە.
سەفەر هرورێ دانیشتووی گوندی هرورێ بە تۆڕی میدیایی ئێستای وت، لە کاتژمێر 10:30ی پێشنیوەڕۆی ئەمڕۆ ژمارەیەک سەربازی تورکیا لە خالێکی سەربازیی تورکیا لەنزیک کەڤرەسورێی بەرامبەر گوندەکەیان بە پیادە چوونەتە ناو گوندەکەی ئەوان و دوای نزیکەی نیو کاتژمێر گوندەکەیان بەجێهێشتووە.
ئەو هاوڵاتییەی گوندی هرورێ باسی لەوەکرد، سەربازەکانی تورکیا پێیانوتوون خۆیان دووربگرن لەشوێنی شەڕەکە و نەچنە ناو ئەو زەویانەی دوورن لەگوندەکە، ئەگەر چەکیشیان هەبێت هەڵینەرگرن.
