وەزیری دەرەوەی ئەمریكا بە ئێران دەڵێت، واز لە مامەڵە “نا ئەخلاقییەكان”ی بهێنێت و سیامەك نمازی ئازاد بكات، كە ماوەی پێنج ساڵە لەلاین ئەو وڵاتەوە خۆی و باوكی زیندان كراون.
لە تویتەری خۆی ئەمڕۆ سێشەممە 13ی تشرینی یەكەم، مایك پۆمپیۆ، وەزیری دەرەوەی ئەمریكا ڕایگەیاندووە، “نمازی پیاوێكی بێتاوانە، ئەو و باقری باوكی و موراد تهباز پێویستە ئازاد بكرێن و یەك ڕۆژی دیكە لە زیندان نەبن، پێویستە ئێران كارە نائەخلاقییەكانی ڕابگرێت و لێیان بگەڕێت بگەڕێنەوە وڵاتی خۆیان”.
دادگای ئیران بە 10 ساڵ زیندانی سیامەك نمازی شارەزا لە پەیوەندییە نێودەوڵەتییەكان و ڕاوێژكاری كار و باقر نمازی باوكی، فەرمانبەری پێشووی ڕێكخراوی نەتەوەیەكگرتووەكان-ی سزا دا، بە تۆمەتی “هەماهەنگی كردن لەگەڵ حكومەتی ئەمریكا”.
سیامەك نمازی و باوكی هاوڵاتیی ئەمریكی بەڕەگەز ئێرانین، ماوەی پێنج ساڵە لەلایەن ئێرانەوە زیندان كراون.
