سەرۆکوەزیرانی عێراق ڕایگەیاند، لیژنەیەک کاری خۆی دەکات بۆ ناردنی بەشە بودجەی هەرێم و ئەو ڕێککەوتنەش لەبارەی بەشی هەرێمەوە کرا ڕێککەوتنێکی باشبووە.
مستەفا کازمی، سەرۆکوەزیرانی عێراق لە چاوپێکەوتنێکدا لەگەڵ میدیاکان ڕایگەیاند، “ئێستا پەیوەندی نێوان بەغداد و هەرێم لە سەردەمی زێڕینیدایە و هەماهەنگی باش هەیە لە نێوان هەردوولادا”.
کازمی لەبارەی ڕوداوەکانی ناوچە کێشە لەسەرەکان ڕایگەیاند، “بەم نزیکانە بڕیار لەسەر شێوازی بەڕێوەبردنی ئەو ناوچانە دەدرێت و تا پێش هەڵبژاردنی پەرلەمانی، پارتی دیموکراتی کوردستان بارەگاکانیان وەردەگرنەوە”.
لەبارەی دۆخی عێراق و هەڵبژاردنەوە، مستەفا کازمی ئاماژەی بەوەکرد، “بڕیاری هەڵبژاردنی پێشوەختە، لە پێناو عێراقییەکاندا بوو، من هیچ کاندید و لیستێکم نییە و کاندید نیم، پشتگیری لە هیچ کەسێکیش لە هەڵبژاردندا ناکەم”.
سەرۆکوەزیرانی عێراق لەسەر هێرشی تورکیا بۆسەر سنورەکانی هەرێم وتی “ئێستا خەڵکی گوندەکان بەهۆی ئەو پێکدادانانەوە قوربانین، ئێمە هەوڵی تەواو دەدەین بۆ چارەسەرکردنی هەڕەشەکانی ئەو ئۆپەراسیۆنانە، هاوکات هەوڵدەدەین چارەسەری هێزەکانی پارتی کرێکارانی کوردستان بکەین لەو سنورانە و چارەسەری گونجاوی بۆ بدۆزینەوە”.
