سەرۆكی هەرێمی كوردستان داوا لە بەغداد و هاوپەیمانیی نێودەوڵەتی دەكات، كاربكەن بۆ دروستكردنی هێزێكی هاوبەشی نێوان پێشمەرگە و سوپای عێراق لە ناوچە جێناكۆكەكان.
دوای هێرشەكانی چەكدارانی داعش بۆسەر سەنگەرەكانی پێشمەرگە لە نزیك پردێ، كە بووە هۆی شەهید و برینداربوونی چەند پێشمەرگەیەك، نێچیرڤان بارزانی، سەرۆكی هەرێمی كوردستان پەیامێكی بڵاوكردەوە، شەهیدبوونی سێ پێشمەرگەی دووپاتكردووەتەوە، دەڵێت، “ئێمە چەندین جار حكومەتی فیدرالی عێراق و هاوپەیمانیی نێودەوڵەتیی دژی داعشمان لە مەترسیی بەهێزبوونەوەی داعش و سوود وەرگرتن لە بۆشاییە ئەمنییەكانی ناوچە ناكۆكیلەسەرەكان ئاگاداركردووەتەوە”.
سەرۆكی هەرێم جارێكی دیكە داوا لە پەرلەمان و حكومەتی فیدراڵی عێراق و هاوپەیمانی نێودەوڵەتیی دژی داعش كردووە، “بەخێرایی كاربكەن لەسەر دروستكردنی هێزی هاوبەش لەنێوان پێشمەرگە و سوپای عێراق لە ناوچە ناكۆكیلەسەرەكان، بۆ ئەوەی چیدیكە ئەو ناوچانە وەك كۆریدۆری جموجۆڵە تیرۆریستییەكان لەلایەن داعشەوە بەكارنەهێندرێت، چونكە ئەوە مەترسییەكی زۆر گەورەیە لەسەر هەرێمی كوردستان و هەموو عێراق و هەڕەشەیە لەسەر ئاسایشی هەموو ناوچەكە و جیهان”.
ئامادەیی هەرێمی كوردستانی پیشانداوە بۆ هەموو جۆرە هاوكارییەك لەپێناو دروستكردنی ئەو هاوبەشی و هاوئاهەنگییە بەشێوەیەكی خێرا.
