فەرمانگەی تایبەتمەندی سەربە نەتەوەیەکگرتووەکان هۆشداری توند دەدات لەدۆخی ژینگەی عێراق و دەڵێت، ڕووبەری پیسبوو بە مین و تەقەمەنییەکانی جەنگ لە عێراقدا نزیکەی سێ ملیار مەتر چوارگۆشەیە، کە بە پیسترین ژینگە دادەنرێت لەجیهاندا لە ڕووی بڵاوبوونەوەی مین و تەقەمەنییەکانەوە.
بەپێی فەرمانگەکەی سەربە نەتەوەیەکگرتووەکان، لەو ڕووبەرەی عێراق هەرێمی کوردستان 257 ملیۆن و 378 هەزار و 865 مەتر چوارگۆشەی لە هەرێمی کوردستانە.
بەپێی فەرمانگەکە، عێراق پیسترین وڵاتی جیهانە لەڕووی بڵاوی مین و جۆرەکانی دیکەی تەقەمەنیی جەنگی، هەروەها وڵاتەکە پیسبوونی ڕوبەرێکی زۆری بە مین لە ئاستێکی زۆر بەرزدایە.
ئاماژەی بەوەشکردووە، پارێزگای بەسرە پیسترین ژینگەی هەیە لەعێراقدا لە بوونی کێڵگەی مین بەهۆی جەنگەکانی ڕابردووەوە، 883 ملیۆن مەتر چوارگۆشەی ئەو پارێزگایە بە مین پیسبووە، لە ئەنجامی جەنگی عێراق-ئێران لە ساڵەکانی 1980 بۆ 1988 هەروەها جەنگی کەنداو لە ساڵی 1991، هەروەها ئازادکردنی عێراق لەلایەن ئەمریکاوە لە ساڵی 2003دا، ئەم ڕووبەرە بە درێژایی سنوورەکانی عێراق لەگەڵ ئێران و سعودییە درێژبووەتەوە.
ئەو بەرپرسەی بیرلودهاوسی سەربە نەتەوەیەکگرتووەکان ئەوەشی وتووە، سەرەڕای ئەوانەش زۆرێک لە ناوچەکانی عێراق کە لە ژێر دەسەڵاتی داعشدا بوون پاشماوەی تەقینەوەیان تێدایە بەتایبەت بۆمبی چێنراو، بەڵام تاوەکو ئێستا هیچ ڕوپێوییەکمان لەبارەی ڕووبەرەکەیەوە نییە.
